Tamgarebt, sɣur Jeǧǧiga Nat Σli

Illustration Sonia Lounis
Gouache sur Canson

Tamgarebt

Amacahu di teẓgi

Nnuɣen sin yimqerqar

Yusa-asen-d inebgi

Yečča imessi d aṣemmaḍ

Timqerqert terfed Σini

Tgureb s axxam ugemmaḍ

Iwakken ad d-tuɣal

Ijmeɛ-as-d akk at leɛraḍ !

Tamacahut d tagi

Mesleɣ-tt-id am ucebbaḍ :

Iteddu yimeqerqer di teẓgi

La yettneggiz, yettnecraḥ

Mi t-iwwet wugur, yeɣli

£ef wudem i yeberttax

yufa di lqaɛa duru

Yuzzel, yerra s aneftaḥ

Inefeq-itent-id d aqerru

S axxam-is mi yederdeḥ

A yettjellib, yettuɣu :

A tamɣart heggi imensi

Assa nefqeɣ-d ad nefreḥ

Ad nečč imensi n lɛali

Ad d-ɛeṛḍeɣ leɛmum-iw

D waytma wid-ak n ṣṣeḥ

Ata nefqeɣ-d ikerri

D tameɣra alama d ṣebbeḥ

Timqerqert tectaq rbeḥ

Tečča akk aksum-nni

Texdeɛ tagela d lemleḥ

Terra talaba ɣef yimi !

Akken i d-usan yinebgawen, leɛmum akked watmaten

Afen-d d tilemt taccult terra ɣef yisɣaren.

Imeqerqer : A tamɣart sers-d imensi

Tseqqiḍ-aɣ-d ayen akken

Timqerqert : A yamɣar, imensi werɛad yewwi

Ma d ayen akken, ula di lɛid ur tneṛwi !

Imqerqer : A tamcumt i ciccu-nni

Inebgawen ɛussen-iyi !

Timqerqert : A yamɣar, greɣ-t di teccult yefsi

Γas segged-asen-d inisi !

Imqerqer : A tamɣart, teǧǧiḍ atma mebla imensi !

Imqerqer si zɛaf iberreḥ

Inṭeq s tawalt-nni

Timqerqert tṛuḥ, teccaḥ

Tennebra deg yiḍ-nni !

Akken kan i d-yuli ṣbeḥ

Iqqim di tiɣilt, ala yettinẓi

Ma d iẓri-s isaḥ,

am yiɣzer ineggi

Indeh : "a yat leɛraḍ ɛiwnet-iyi

Tamɣart tṛuḥ, teǧǧa-i

Tewwi yid-s ula d Σini."

Tluɛa-t-id tyaẓiṭ :

-Ciw,ciw, ixḍa-k a ɛemmi imqerqer

Tamɣart iṛuḥen ad tt-id-nerr !

Tṛuḥ tyaẓiṭ ɣer temqerqert tesqerbeb-as ɣef tewwurt, tin terr-d :

- Menhu derdek ɛecci ?

Aqeclaw ɣef imensi !

-Nekk d nanna-m tayaẓiṭ welt tyaẓiṭ

Yesrusen i wass ɛecra tmellalin

Ad tezwireḍ zdat-i neɣ ad kem-gezreɣ am tqeṭiṭ

-Buh fell-am !

Amer d kemm i d nanna tayaẓiṭ welt tyaẓiṭ

Yesrusen i wass ɛecra tmellalin !

Tilli ur nufiɣ ara lalla-m tettenneḍ tiɣerɣet

Kemm tesruseḍ-as tberriḍin !

Ecc akkin ! Yexzu-kem !

Tuɣal tyaẓiṭ ɣer yimqerqer tenna-as tugi ad teddu

Imeqerqer yeẓmi-d allen-is, yettinẓi, la yettuɣu !

Tluɛa-t-id tgerfa :

Σiq, Σiq ! Σemmi imqerqer

Nekk d lalla tagerfa, ad tt-id-rreɣ s ḍrafa !

Tṛuḥ ɣer temqerqert, tesqerbeb-as ɣef tewwurt, tin terr-d :

- Menhu derdek ɛecci ?

Aqclaw ɣef imensi !

- Nekk d lalla-m tagerfa welt tgerfa

I d-yewwin aman di Mekka

Ad tezwireḍ zdat-i

Neɣ aɛekkaz deg-m itekki

- Buh fell-am ! teǧǧiḍ mmi-s deg weḥriq, la yettegririb ittijjiq !

Amer d kemm I d tagerfa welt tgerfa

I d-yewwin aman di Mekka

Tilli ur kem-in-ufiɣ ara deg ugudu,

La teqqazeḍ tawekka !

Ṛuḥ ad m-igzem Ṛebbi aɛenqiq !

Tuɣal ɣer yimqerqer

Tewwi-as yir lexbaṛ

“Ula i k-xedmeɣ”

Imqerqer yuɣal s imeṭṭi

D weglilez deg uɣebbaṛ !

Iluɛa-t-id yisɣi :

- Nekk d dadda-k isɣi, ijebren yal d iɣisi

Tamgarebt ad tuɣal ur d as-yehwi !

Iṛuḥ ɣer temqerqert, isqerbeb-as ɣef tewwurt, tin terr-d :

- Menhu derdek ɛecci ?

Aqclaw ɣef imensi !

- Nekk d dadda-m isɣi ben isɣi

Bu teḥzamt ufilali

Yettafegen di leɛlali

Ad tezwireḍ zdat-i, neɣ adebbuz ad yeḥlelli !

- Buh fell-ak ! ma d kečč i d isɣi !

Amer d kečč i d isɣi ben isɣi

Bu teḥzamt ufilali, yettafgen di leɛlali

Tilli ur k-in-ufiɣ ara deg ugudu tgiḍ isni !

Ṛṛeẓ akin fell-i !

Yuɣal-d ɣer yimqerqer

S tmeṭṭut ur d-yegli

"Tameṭṭut-ik tewɛer

D ajenwi i yiri !''

Iluɛa-t-id uɛeẓwan :

- A ɛemmi imqerqer ɣas ttkel felli

Tamgarebt ad tuɣal, fiḥel awal, fiḥel asteqsi !

Yerza ɣer temqerqert, isqerbeb-as ɣef tewwurt, tin terr-d :

-Menhu derdek ɛecci ?

Aqclaw ɣef imensi !

- Nekk d dadda-m ɛeẓẓi ben ɛeẓẓi

Bu tmezlugt utunsi

Ad tezwireḍ zdat-i

Neɣ taxeṭṭaft ad kem-tawi !

- Buh fella-k a yaɛẓwan !

Amer d kečč i d ɛeẓẓi ben ɛeẓẓi

Bu tmezlugt utunsi

Tilli ur k-in-ufiɣ ara annect n tummeẓt

Yettawi-k ubeḥri !

Ecc akkin fell-i !

Yuɣal-d ɣer yimqerqer

S tmeṭṭut ur d-yegli

"Tameṭṭut tewɛer

Ur s-yufiɣ leqrar !"

Iluɛa-t-id wemcic :

Rɣu, rɣu...

-Aɛemmi imqerqer, ur neddeb, ur ttru

Yusa-d dadda-k amcic ad k-tt-id-ifru !

Iṛuḥ ɣer temqerqert isqerbeb-as ɣef tewwurt, tin terr-d :

-Menhu diɣen derdek ɛecci ?

Aqeclaw ɣef imensi !

- Nekk d dadda-m amcic ben amcic

Γur-i tiṭ leɛmer teqmic

Ad tezwireḍ akka zdat-i

Neɣ ad tɛeddiḍ deg ubuḥcic !

- Buh! Buh fell-ak !

Limmer dɣa d kečč i d amcic ben amcic

Tḥerceḍ ur teqqineḍ tiṭ

Tilli ur k-in-ufiɣ ara

At wexxam mi ččan taqeṭṭiṭ

Kečč ad k-segrin azeɣṭiṭ

Neɣ mi rran akanaf ad yettwecwic,

Ad k-inin ṣṣeb a yamcic !

Dɣa ṣṣeb akkin !

Yuɣal-d wemcic :

" A ɛemmi imqerqer

Tameṭṭut am ta

Ur tt-ẓriɣ leɛmer !"

Imqerqer yuɣal ɣer imeṭṭi

La yettuɣu, yettinẓi !

Iluɛat-id wezrem :

SSS !

-Ata yewweḍ-d dadda-k azrem

Tamɣart ad tuɣal, berka-k asriddem !

Iṛuḥ ɣer temqerqert, isqerbeb-as ɣaf tewwurt, tin terra-d :

-Menhu derdek ɛecci ?

Aqeclaw ɣef imensi !

- Nekk d dadda-am Azrem

Bu teglimt berqacen

Itekken deg yijqiqen

Ad tezwireḍ zdat-i

Neɣ ad ṣuḍeɣ deg-m !

Timqerqert tebda la tettergigi :

-Dadda Azrem, d keččini ?

Ihi ad ẓewleɣ, ad refdeɣ Σini

Ad zwireɣ zdat sidi !

Tuɣal-d tin igurben

Zeqfen imeṭṭawen

Qqimen di sin

Rrif n lkanun, ttemlaqaben :

- Buh a taẓbulin-inna ! win i s-yenna

-Buh a timeṣruqin-inna ! tin i s-d-terra.

Ma tamacahutt tekfa.

NAIT BENALI Djedjida