 |
| Illustration (reproduction) Sonia Lounis Crayon sur papier |
Mi tecceḍ temẓi
Tislit n uceṭṭid
Tezga deg urebbi-sAẓawan n yiḍ
Yezuzun ixef-is
Tezga tettεeyyid, ayen tebγa ur tewwiḍ, iciwi-s yettγiḍ, yiwen ur s-yekmis
Mazal-itt akken
Akud-is yezri
Seg wayen tefren
Acemma ur d-yegri
Ass-a s yifassen, teslaf i wissen, ma dayen nniḍen, γef tiṭ yedduri
Tafekka-s teqqur
Tuggi ad tejuǧǧeg
Irewwel-as umur
Wissen anda yedreg
Γer tamma n waggur, tezga tessutur, acimi leγrur, tayri-s teddegdeg
Teγli-yas-d tadist
Ilul-d d aqeṭṭiḍ
Γef medden tefri-t
Seg-s ur yeṭṭiḍ
Γef wul-is tadimt, tezdeγ tameddit, iswi-s tzegl-it, iẓri-s yettfeggiḍ
Winna tt-iγuṛen
Igzem-as tassa
Seg-s yessasen
Γef temẓi-s yeḍṣa
Yedreg γef allen, allen t-ifernen, ur d-yefki isallen, wissen anda yeksa
Ma d ta i d tawenza
I s-yurra wemcum
Ass-nni i tt-yeṛẓa
S tebrek i tt-iγum
Amek ara d sken tamẓa, tura mi tenza, γef tirgin tezza, am tqeṭṭiḍt n uksum
Ass-a γef taddart
Tuγal d aεekkur
Qqnen-tt s temrart
Gezmen-as amzur
Tedder tettmettat, aẓekka tmenna-t, ma d udem n tafat, yeḍla-d ageffur
Reẓqi Urrabiɛ (Rezki Rabia)
Aucun commentaire:
Enregistrer un commentaire