mercredi 2 novembre 2011

Muḥ Uperpuc d Piluca, sɣur Sunya Lewnis

Asuneɣ s ukeryun ɣef lkaɣeḍ
sɣur Sunya Lewnis












Muḥ Uperpuc d Piluca


Muḥ Uperpuc yeggul tikelt-a ard yemmet s tidet akken ad iwali s wallen-is amek tga lǧennet. Yenna-yasen : Ihi tura ma yella tkellxem felli am tikelt-nni iɛeddan xas ad ten-seṭleɣ ! Ikker ɣer Piluca yenna-yas :
A Piluca, inaɣ mazal-ikem tebɣiḍ-iyi ?
Piluca tessuder iẓri-s :
Ih, byansur bɣiɣ-k a Muḥ Uperpuc.
Yah ! Ihi kker ini-asen ad iyi-anfen ad mteɣ tikelt-a. Bɣiɣ ad d-waliɣ Muḥend Uyeḥya !
I m'ara temmteḍ tɣileḍ ad d-yuɣal ugacuc-ik ɣer ddunit a Muḥ Uperpuc ! Muḥend Uyeḥya iruḥ. Aha kan tura ala aggaḍ ara naweḍ akk anida akken yewweḍ !
Nniɣ-am nekk ad ruḥeɣ ad d-ẓreɣ Muḥend Uyeḥya. Ipi xas ini-asen, tikelt-a ulac ad bɣuɣ ad ččeɣ ulac ad bɣuɣ ad qaqḥeɣ.
I syenna ad asen-iniɣ amek i tt-tefriḍ d rray-ik i tuɣalin ?
A Piluca ẓriɣ-kem tebɣiḍ-iyi tojoṛ. Mi nekkini yenna-d yixf-iw Muḥend Uyeḥya. Tura ma tebɣiḍ ad tedduḍ lḥu !
Wali kan ziɣ wagi ! Nekk bɣiɣ-k i tudert a Muḥ Uperpuc xzu cciṭan ah ! Eǧǧ lǧennet i wid-is ah !
Nniɣ-am ma tebɣiḍ ad tedduḍ lḥu, ma tugiḍ anef-iyi i nekk ad ruḥeɣ ah !
I tura ṣafik tebɣiḍ ad tesseɣreḍ aqerru-k !
Siṭadir tura kunwi win yeṭṭfen deg wawal-is ibɣa taɣawsa ad as-tinim d taɣert n uqerru ! Ipi kemm, acuɣer tugiḍ ad tedduḍ yid-i ?
Nekk ugadeɣ a Muḥ Uperpuc !
Alalalaaaaa ! Mi tebɣiḍ-iyi tojoṛ !
Ih, bɣiɣ-k tojoṛ, mi i ddunit.
Yah ! Ṣafik mi ruḥeɣ ad iyi-tettuḍ !
Ur ttruḥu ara a Muḥ Uperpuc. Ad s-nini i Duktur Wakli ad d-yas ad k-iwali.
Nekk d Muḥend Uyeḥya ay bɣiɣ la m-qqareɣ ah ! Duktur Wakli ceyyeɛt-t i Ssi Funi ! Tutfaṣa nekk d Muḥend Uyeḥya kan ara yi-tt-id-yefrun.
D acu akka ara k-d-yefru Muḥend Uyeḥya a Muḥ Uperpuc ?
Lḥu-n ad tedduḍ yid-i ad teẓreḍ !
Nniɣ-ak ugadeɣ.
Ihi qim ! Ma d nekk ad ruḥeɣ.
A Muḥ Uperpuc, Amek ara xedmeɣ nekk sinnakkin ?
Iyya-n ad tedduḍ, nniɣ-am !
Ipi dabur teḥsiḍ di lǧennet i yella Muḥend Uyeḥya ?
Ihi tenniḍ-as kemm d lifrir mizilma i yellan din !
Atan a sidi truheḍ teẓriḍ Muḥend Uyeḥya. I syenna d acu ara txedmeḍ ?
Iba nekk bɣiɣ-t ad iyi-d-yini ma ttqaqqaḥen di ǧahennama.
I wacu a Muḥ Uperpuc ?
I wacu ? Axaṭar ma yella di lǧennet ulac, di ǧahennama ulac, ad ten-id-nfakk meqqar da !


Sunya Lewnis

1 commentaire:

  1. azul a ṣunya. lukan ad tezreḍ acḥal i d-iyi-taɛǧeb tira yagi inem Muḥ uparpuc ad yendem di rray-is ad yeqqim ɣer taɛzizt-is acku muḥya yettweṣi ɣef tudert i teqbaylit ɣef teqbaylit, mači ɣef tmettant fell-as. tira yagi nek mi i tt-ɣriɣ deg-s walaɣ urar, maḥsub bɣiɣ ad turar am tcequft n umezgun, i tejmilt n Muḥya. tanemmirt a ṣunya tanemmirt.

    RépondreSupprimer