Aɛeqqa n ṣber, sɣur Murad Irnaten



Illustration prise dans Princesse Sheherazad
Le serpent à deux têtes

Aɛeqqa n ṣber

Macahu, Rebbi ad tt-yesselhu, ad teg asaru ad taweḍ annect n ujgu.

Ḥekkun-d, asmi ihedder kullec, tella yiwet n tmeṭṭut d taǧǧalt, argaz-is ur s-d-yeǧǧi ara dderya. Teqqim-d sakin tmeɣbunt weḥd-s la aqcic la taqcict, ur tesɛi ḥedd d amwanes, yenɣa-tt lweḥc, ulac w'ara s-yekksen lxiq.

Yiwen n was, tekker-d sbeḥ tafejrit, tebda taẓallit, dɣa tmuqel ɣer tesga twala tacmuxt, terra-d nehta werǧin s-tesli, tenna deg wul-is : « Ah ! Mennaɣ a wi yesɛan yelli-s xas ulama tacmuxt-inna, ad att-isɛu d tamwanest, ad tekkes fella-s lḥif d wurrif». Akken teɣra ɣer tegnawt, terra-d leqedra s wawal, dɣa din din, urɛad d-suli ameslay, s lqedra n bab n yigenwan terfed s tadist, kra n wussan kan terba-d, tesɛa-d tacmuxt. Tneṭq-d tecmuxt-nni, tneggez-d ɣer wadda n tɣerɣert, tenna-yas : « Aqli a yemma ! Ad kem-wansaɣ, ad kseɣ ɣef ul-im lḥif d wurrif akken tmennaḍ...». Akken i tt-twala, tegguma lqaɛa ad att-tawi si lferḥ, teqqar kan : « Ḥrez-i yelli ! Ḥrez-i yelli ! ». Seg wass-n taǧǧalt tesɛa yelli-s. 

Ttɛeddin wussan d wuḍan, xas akken tekksa-s lxiq ussan-nni imezwura, taǧǧalt tebda tettmilli di yelli-s tacmuxt, teɛya di lhedra n lǧiran d tin n tnuḍin, amek ara trebbi tacmuxt yeṭfen tasga : « tilawin akk sɛant dderya tumɛint, nekk sɛiɣ-d tacmuxt ur tettembiwil ur txeddem ur reddem ». Yiwen n wass, tekker-d sbeḥ, uqbel ad taki tecmuxt, tḍeqqer-itt, tsedda-tt deg wafrasen. Lawan-nni, iɛedda-d uzrem, iwala-tt, teɛjeb-as, ijmeɛ-itt, yewwi-tt s axxam-is.

Azrem-nni, yesɛa lqedra. Mi yekcem deg yimi n tewwurt ad yuɣal d amdan, mi t-yefka umnar ɣer berra, yettuɣal d azrem. Akken i d-yewweḍ s axxam iruḥ ad tt-isers ɣef teḥnact, tecceḍ-as ger yifassen-is tecmuxt-nni, teɣli, terreẓ, teffeɣ-d deg-s teqcict, dayen kan i d taqcict ! Ayyur deg yigenni nettat di lqaɛa. Tawenza-s d tawraɣt ad s-tiniḍ d ddehb yuraden, taksumt d tamellalt am teftilt ireqqen, tiṭ-is d aɛeqqa n uzemmur yewwan, tiḥnakin-is d lwerd azeggaɣ yefsan, taɣenjurt xas kkes-d yi-s asennan, taqemmuct d ɛecra duru yeflan, ma d taɛenqiqt, mi teswa ad ḍehren waman. Akken i tt-iwala uzrem yefreḥ, yerra-tt d yelli-s, yerna iḥemmel-itt am umemmu n tiṭ-is. Seg wakken taqcict amzun d ayyur, Tiziri i s-iga isem, isker-itt am wakken d yelli-s i d-yekkan seg yidammen-is. Simmal tettnerni simmal ṣṣifa-s tettnerni, tiṭ i tt-yeẓran ad tt-tmenni, ilmeẓyen akk bɣan-tt; ɣer tala m'ara tɛeddi, win tt-iẓran ad yessefru. Baba-s, Azrem, akken tt-yeẓra tewweḍ d tilemẓit, tebda tettissin d acu i d ddunit, yugad fella-s si tmuɣli n medden, yerna yugad ad tt-smesden ad s-mmlen lbaḍna i s-yeffer acḥal d aseggas, dɣa iqḍeɛ-as tuffɣa, iga-yas amnar d talast, akken ad yerr fella-s allen. Yal m'ara d-iḥder ad yeffeɣ ad s-yendeh : « Ha ! A yelli ḥader i wumi d-telliḍ tawwurt neɣ ad k-m-yefk umnar ɣer berra ! Kem a yelli d nneya, imdanen ur sɛin ara laman ».

Yiwen n wass, yeffeɣ uzrem am wakken yuɣ tanumi, yeǧǧa Tiziri deg uxxam weḥd-s. Akken tebda tettḍummu, teldi-d tawwurt ad tsuffeɣ afrasen, akken i tt-id twala tǧaret-is, ɣeẓẓant-tt-id tismin imi tt-teẓra tecreḥ am yiṭij n sbeḥ, dɣa tebɣa ad tt-tesnuɣni, tluqeb-itt-id tenna-yas : « A tin i d-irebba uzrem ». Tiziri tewhem ayɣer i as-d-tenna akken, testeqsa-tt : « Di leɛnaya-m ma ur d-iyi-temliḍ lmaɛna n wawal -agi i d-tenniḍ ? ». Terra-yas-d : « baba-m ihi, d azrem ». Akken tesla i wawal-nni, tekcem s axxam, temdel-d lelwaḥ, terra-tt sakin i yimeṭṭawen, tru almi d ayen. Mi d-ikcem baba-s yufa-d akken imeṭṭawen deg wallen-is isteqsa-tt acu yellan, dɣa teḥka-yas-d, tenna-yas : « ass-agi tluqeb-iyi-d tǧaret-nneɣ, tenna-yi baba-m d azrem, ilaq tura ad iyi-d-tesfehmeḍ ». Azrem irkeb-it umeskun, yeggul ad d-yerr ttar di tin i d-iɣeḍlen imeṭṭi deg wallen n yelli-s, tin yebɣan ad-tefḍeḥ lbaḍna-s. Isfeḍ-as imeṭṭawen i yelli-s yenna-yas : « d tismin i tusem seg-m, ihi, mi m-d-tɛawed tenna-yam-d akka ini-as argaz-im yebɣa-yi, ad iyi-yaɣ, ad s-d-sɛuɣ aqcic, yerna ad akem-yeǧǧ ». Imi yeẓra tameṭṭut n lǧar-is d tiɛiqqert yebɣa ad izzu tassa-s.

Azekka-nni, teffeɣ-d daɣenni ɣer yimi n tewwurt, tluqeb-itt-id tǧaret-is i tikelt tis snat, tɛedda terra-yas am wakken i s-yenna baba-s.

Ma d azrem ittheggi-yas taxnanast i tǧaret-nsen. Iruḥ ɣer lǧar-is i s-d-iḍelben yakan afus n yelli-s yenna-yas :

« Qebleɣ ad k-fkeɣ yelli, acu kan s ccerṭ. Ad k t-id-iniɣ asmi ara teddu ». Win yeqbel.

Taǧaret, ijreḥ-itt wayen i s-tenna Tziri, tessaweḍ-as-t akken yella i wergaz-is. Yenna-yas-d d tidet.

Tiziri ad teddu d tislit, ad tt-yaɣ lǧar-is, taǧaret yezza yimiḍ-is, yesraddem yeẓri-s. Azrem iruḥ ɣer lǧar-is ad as-imel ccerṭ yenna-yas : « ass-a ad k-fkeɣ yelli, uqbel ad teffeɣ seg uxxam ccerṭ-iw ihi ad iyi-tefkeḍ tameṭṭut-ik ad sweɣ idammen-is ». Argaz yeqbel ccerṭ n uzrem yefka-yas tameṭṭut tameɣbunt. Azrem yewwi tameṭṭut, iger-itt deg ukufi, yettraǧu kan ad teffeɣ yelli-s akken ad issew idim-is. Syennakin yenna-yas i Tziri : « A Tiziri a yelli teẓriḍ acḥal ɛzizeḍ felli, ihi uqbel ad teffɣeḍ seg uxxam ɛahed-iyi ur d tezziḍ ara ɣer deffir ayen yebɣun yeḍru ».

Tenna-yas : « Σuhdeɣ-k a baba-inu. ».

Mi d-yewweḍ lawan ad teddu, akken i tt-ifka umnar ɣer berra, temmekta-d tettu timceḍt d lemri i d as-ifka baba-s, dɣa mi d-tezzi ad ten-tawi tufa-d baba-s yuɣal d azrem idammen n tǧaret deg yimi-s, akken i tt-id-iwala yenna-yas : « ad kem-yexdeɛ Rebbi a yelli akken i d-iyi-txedɛeḍ, maɛna akken i terẓiḍ lemɛahda ara txelseḍ ». Tiziri teffeɣ seg uxxam n baba-s s imeṭṭawen, mi tewweḍ ɣer uxxam n urgaz-is, yules-as-d taqsiḍt n uzrem amek tella...

Ttɛeddin wussan, Tiziri terfed tadist, yerna ɣur-s uqcic amenzu. Ass wis- sebɛa, yeǧǧa-tt uzrem almi teṭṭes, yerza ɣer dduḥ, yewwi aqcic-nni, yessames-as imi-s i Tziri s yidammen. Mi d tekker sbeḥ, tufa-d mmi-s ulac-it, imi-s yeččur d idim, akken i tt-iwala wergaz-is yenna-yas : « A tameṭṭut amek teččiḍ mmi-m ? Mazal idammen-is deg yimi-m ». Tagujilt tejreḥ tasa-s, tedderɣel seg yimeṭṭawen tenna-yas : « Ay argaz wah ! Xzu cciṭan ! Amek ara ččeɣ tasa-w, kreɣ-d sbeḥ ufiɣ-d mmi ulac-it ! ». Yenna-yas : « Semḥeɣ-am tikelt-a, meɛna ur tettuɣ ara ». Abrid-agi tɛedda temsalt. Terna kra n wussan, terfed i tikelt tis snat, tesɛa-d daɣen aqcic wis sin, yeǧǧa-tt baba-s almi teṭṭes, yusa-d yuker-as daɣen mmi-s, yessames-as idammen i yimi-s. Mi d tekker sbeḥ iffeɣ-itt leɛqel, ma d argaz-is, yugi ad tt-yamen tikelt-agi yenna-yas : « A tameṭṭut teččiḍ mmi-m daɣen, semḥeɣ-am tikelt iɛeddan, ma d abrid-agi tḥeqqeɣ teččiḍ tarwa-m, baba-m d azrem, amek ara txalfeḍ abrid-is ? ». Ulac s wacu ur s d-teggul ara, yugi ad tt-yamen almi tcuk deg yiman-is. Yenna-yas : « imi kem tetteḍ tarwa-nneɣ ur zmireɣ ara ad kemleɣ yid-m akka, ilaq-iyi ihi ad ɛiwdeɣ zwaǧ n leḥlal ad sɛuɣ dderga n leḥlal, meɛna uqbel ad tt-id-awiɣ ḍleb-iyi-d ccerṭ aneggaru tebɣiḍ ad am-t-id-xedmeɣ ». Tiziri terra timedlin i wul-is, tsenger iẓri-s s imeṭṭi. Amek ara teḍru yid-s ? Argaz-is ad s-d-yernu takna. Tefra-tt d rray-is tenna-yas : « ad k-d-sutreɣ yiwet lḥaǧa kan, awi-yi-d aɛeqqa n sber ». Argaz inuda yak leswaq anda ara yaf aɛeqqa n sber, ulac, iruḥ s amɣar azemni, yemla-yas-d anida ara t-yaf. Iruḥ yewwi-yas-t-id. Tiziri Iẓri-s ineggi kra yekka was d kra yekka yiḍ. Akken teṭṭef aɛeqqa-nni n sber inɣel-d wul-is, tebda tḥekku-yas, ayen yakk yeffer ufwad-is acḥal aya, iḍum-it-id yiles-is. Tḥekku i uɛeqqa teqqar: « d ta i d taqsiḍt n ddunit-iw a yaɛeqqa n sber ru ma d-truḍ, tesɛa-yi-d yemma d tacmuxt, a yaɛeqqa n sber ru ma d-truḍ, tsedda-yi deg wafrasen, a yaɛeqqa n sber ru ma d-truḍ, yufa-yi uzrem a yaɛeqqa n sber ru ma d-truḍ, isker-iyi-d, a yaɛeqqa n sber ru ma d-truḍ, yefka-yi d tislit i lǧar, ru ma d truḍ, ass-a ad yernu fell-i takna ru ma d truḍ ...» Nettat tḥekku aɛeqqa n sber yettimɣur, yettfukti, ijmeɛ akk ayen yellan deg wul-is, akken refden ad d-awin takna, Tiziri yuɣ lḥal tekfa-d taqsiḍt n ddunit-is, ma d aɛeqqa n sber iberren, yettfukti almi yewweḍ annect n ukufi, dɣa yeṭṭerḍeq fɣen-d seg-s sin warrac ttirriqen am yitran. Tiziri teɛqel tarwa-s, tessawel i wergaz-is, akken i ten-yeẓra yeḥbes tameɣra, temlal tasa d wayen turew, ma d azrem ikker-d ar yell-is yenna-yas : « a yelli d ajerreb kan i kem-jerbeɣ bɣiɣ ad tissineḍ ddunit, imi lemɛahda tgezzem am umenṭas ma d sber d lsas ur nettnefḍas ».

Tamacahut-iw asif asif, wwiɣ-tt-id seddaw useqqif, uḥric ad tt-ifhem ad tt-isif ma d ungif ad tt-yerr di rrif.

Tekfa